- grettir.net

Ég opnaði besta Visa reikning sem ég hef fengið í 14 ár:
Til Greiðslu nú: 0 kr.

Þá er bara að snúa sér að næsta láni og senda það sömu leið.

Kunningi minn einn heitir Borgar. Hann fékk ósjaldan að heyra brandarann Hann Borgar þegar farið var á djammið og þótti alltaf jafn fyndið.

Lýður einn Guðmundsson kenndur við Exista hefur kannski fengið að kenna svipuðu gríni með djammfélögum sínum í gamla daga. Lýðurinn borgar hafa félagarnir kannski sagt og slegið á lær sér í gríni.

Og þannig varð Exista til.

Ég horfði á "háttvirtan" þingmann blaðra tóma þvælu í ræðustól á myndbandi á netinu áðan.

Ég sá ekki mikinn mun á þvælunni þeirri sem ég sá og þeirri sem kemur vanalega úr þeim stól.

Þann stól mætti rífa, setja stimpilklukku í andyrið og láta fólk fara að vinna eins og það sé komin 21sta öldin.

Ég get ekki ímyndað mér að vinnan mín gengi vel ef við ræddum málin úr ræðustóli.

Skólasetning í dag hjá drengnum okkar.

Í gamla daga þýddi það að sumrinu var formlega lokið. Það þýðir það enn.

Enda var rigning og vindur í morgun. Ég sníkti far í vinnunna, enda með smá "rubber legs" eftir laugardaginn.

Jæja, nú fer hver að verða síðastur að heita á mig í Reykjavíkur Maraþoninu.

7500 kall kominn (ef ég skila mér í mark). Kærar þakkir til þeirra sem trúa því að ég geri það :D

Nú er ég að spá í að drífa mig niður í laugardal að sækja bolinn minn og flöguna.

Svona fer ég heim í dag:



Hjól atvinnulífsins er töffaða Trek hjólið.

Eins og ég nefndi um daginn þá virðist vera ákveðinn heilaþvottur í gangi um að skilanefnd sé að eignast hin og þessi fyrirtæki, sem er skrýtið þar sem skilanefnd er skipuð fólki sem þiggur laun líkt og ruslakarl þiggur laun fyrir að tæma tunnur fólks að morgni.

Nú kemur í ljós að skilanefnd getur líka tapað hlutum eða eins og segir í frétt á Pressunni:
Landsbanki Íslands getur ekki leyst til sín kvóta Magnúsar Kristinssonar þar sem hann á einungis 12. og 13 veðrétt í honum, er fullyrt í DV í dag. Þar segir jafnframt að skilanefnd Landsbankans tapi á því að setja Magnús í þrot. (Feitletrunin er mín.)

Svona eins og þjónustufulltrúar Landsbankans tapa á því að maður greiðir ekki reikningana sína á réttum tíma.

Það verður að stoppa þennan heilaþvott.

Skilanefnd er skipuð lögfræðingum sem þiggja laun af ríkinu - okkur. Þeir eiga ekki nokkurn skapaðan hlut sem þeir eru að vinna með fyrir okkar hönd, ekki frekar en bensíntittur á dæluna sem hann notar við sína vinnu.

Drengurinn okkar er búinn að vera í Frístund - frístundaheimilinu við Háteigsskóla í sumar. Það er ekkert smá flott dagskrá alla vikuna fyrir krakkana, sundferðir, söfn skoðuð, farið í Nauthólsvík, í Húsdýragarðinn og haldnar grillveislur.

Ekki spillti fyrir þegar Velferðarsjóður íslenskra barna veitti starfinu styrk svo vikan í sumarfrístundinni kostaði ekki nema 2100 kr. sem er bara snilld í kreppunni.

Takk fyrir okkur.

Það eru gamlar fréttir að bankastofnanir landsins ræni mig og mína.

Um helgina reyndi ég að taka út pening úr hraðbanka. Bankinn spurði mig samviskusamlega um kvittun, sem ég þáði. Bankinn bað mig næst um að taka kvittunina, þá kortið og gerir sig líklegan til að spýta út verðlausum pappírssnifsunum út úr þar til gerðri rauf framan á bankanum.

Surgið sem fylgdi boðaði ekki gott - enda gapti bankinn tómlega á móti mér líkt og farinn væri á höfuðið.

Hann gerði aðra tilraun. Meira surg. En allt kom fyrir ekki.

"Upp hefur komið bilun í vélbúnaði" stóð feitum rauðum villulegum stöfum á skjánum í skamma stund áður en mynd af hressilegum þjónustufulltrúa birtist með loforð um greiðsluaðlögun, fjármálaráðgjöf og heimilisbókhald.

Bankinn var tilbúinn fyrir næsta fórnarlamb.

Nú hefur Þráinn sagt sig úr Borgarahreyfingunni af ástæðum sem ég nenni ekki að fara yfir hér en þá veltir maður því fyrir sér hver taki við af honum. Hver er hans varamaður í hreyfingunni?

Því kjósendur voru ekki að kjósa í persónukjöri - heldur var verið að kjósa flokka. Flokkurinn/hreyfingin á sætið en ekki þingmaðurinn.

Það er alveg bannað að skipta um flokk á miðju tímabili og færa þannig öðrum flokki auka sæti sem hann hlaut ekki í kosningum, er það ekki?

Hvað skyldi gerast? Hmmm..

Þess vegna..

Samkvæmt frétt á pressunni drekka rússar 18 lítra af hreinu alkóhóli á ári, sem gerir 45 lítra af 40% vodka eða næstum líter á viku.

Sem er auðvitað ekki nema einn einfaldur á dag. Hver fær sér ekki einn sjúss með cheerios-inum á morgnanna?

Ég er með hálfgerðan æðaslátt í lærunum eftir gærdaginn. Hjólaði 15 km og hljóp svo 8,1.

Stundum vildi ég að það mætti fara á á bíl í þetta blessaða Reykjavíkur maraþon.

kPlaylist er það besta síðan sneitt fransbrauð.

Nú þarf ég ekki að hjóla með fartölvuna mína í vinnuna (þar sem ég hef fartölvu í eigu viðskiptavinar) heldur get hlustað á mína músik heiman frá mér í gegnum browser.

kPlaylist er með flash spilara sem spilar músikina beint, tengingu við last.fm til að sækja plötuumslög og lyrc.com.ar fyrir texta með lögunum.

Ég sakna samt iPodsins sem ég týndi fyrir næstum ári.

Ég er að renna stuttlega yfir fréttir eftir sumarfríið mitt og rakst á tvær fréttir um skilanefndir bankanna:

Skilanefnd Kaupþings eignast veitingahús

Skilanefndir Kaupþings og Glitnis eignast banka

Það er ansi fínt að vera skipaður í nefnd, taka fyrir það himinhá laun og eignast svo bara hlutina sem nefndin er að höndla með.

Dáldið eins og að vera stöðumælavörður og hirða allt klinkið sem kemur úr mælunum.

Í dag hófst rútínan að nýju eftir eitt það besta sumarfrí í manna minnum.

Krakkarnir komnir í frístundarstarfið og á leikskólann og ég hjólaði í vinnuna.

Við erum búin að skrá okkur í Reykjavíkur maraþonið, ég ætla að hlaupa 10km og krakkarnir ætla í Latabæjarhlaupið. Ég hef ekki verið alveg nógu duglegur að æfa í fríinu en vonandi kemst ég í mark því ég er að hlaupa til styrktar Gigtarfélagi Íslands.
Öll áheit eru vel þegin :-)

Helvítis melur ræðst á dauða hluti.
Nú þarf ég að redda nýrri rúðu.

Það var minn sem vakti íbúana sem kölluðu til lögreglu.

Þjófavarnarkerfið hefur stundum farið í gang á nóttunni, sérstaklega þegar ég bjó á Framnesvegi. Menn labba framhjá, taka í húninn til að tékka hvort bíllinn er ólæstur, kerfið fer í gang og skúnkarnir flýja. Eftir nokkrar ferðir á náttfötunum út um miðja nótt hættir maður að nenna og snýr sér á hina hliðina og slekkur með fjarstýringunni eftir 30 sekúndur eða svo. Þá eru yfirleitt aularnir á brott og engin ástæða til að rífa sig upp um miðja nótt.

Þess vegna snéri ég í bælið þegar ég hafði slökkt í nótt.

Næst verður athugað hvað er á seyði - helst með kylfu í hönd.