- grettir.net

... að plögga honum Albin hérna.
Hann var svo elskulegur að bjóða mér gmail, enda mmedia addressan orðin ónýt af rusli. 900+ rusl á mánuði. Ekki gott.

...
- grettir :: nú þarf ég bara að versla bjór fyrir strákinn

Sæt stelpa ( ég vil allavega trúa því að hún hafi verið sæt ) hringdi í mig á vegum Gallúp um daginn og ég tók þátt í könnun.

Spurningarnar voru heilmargar og ég man þær ekki nákvæmlega, en ein var svona:

Nefndu það fyrsta sem þér dettur í hug þegar þú heyrir: Íslenskur iðnaður

Fyrsta sem mér datt í hug voru lopapeysur. Svona eru nú hestagleraugun á mér. Ég sá bara fyrir mér gamlar konur í prjónakeppni.

Ég bið íslenskan iðnað afsökunar.

...
- grettir :: drekk til dæmis íslenskan bjór um hverja helgi

Sá sem hengir sokkana á prikin í Hagkaup er ekki vinur minn. Greip með mér tvö búnt um daginn og var að komast að því þegar þeir komu úr þvotti í fyrsta skipti að pakkarnir eru af sitthvorri stærðinni.
Ég neyðist því til að spekúlera þegar ég fæ mér sokka á morgnanna.

Eina góða við þetta haust sem er í bígerð er sumarbústaðaferðin með vinnufélögunum um næstu helgi. Þar verður drukkið, étið og legið í afslöppun. Það verður einkar skemmtilegt enda við með eindæmum hressir.

Vona bara að þessi drullu-/ælupest sem var í gangi þarna í Húsafelli sé liðin hjá. Það væri nú alveg eftir því að við myndum leka að ofan og neðan eftir ferðina.

...
- grettir :: haust smaust.. sökkar big time

Fjórum sinnum á þessu ári, þar af þrisvar í sumar hef ég verið lagður í bælið af einhverri skítapest. Nú er mig farið að gruna hálskirtlana um græsku, því þessu fylgir ætíð einhver bévítans hálsbólga og sú staðreynd að ég verð vanalega ekki veikur nema eitthvað mikið gangi á. Miltisbrandur eða eitthvað slíkt.

Nú hef ég ekki farið til læknis í rúm 10 ár, en í millitíðinni hef ég flutt í bæinn og veit ekkert hver er heimilislæknirinn minn. Hvert hringir maður? Hvert fer maður? Það er allt í pati hérna á Framnesveginum núna! Það eru þrír pizzastaðir, Subway, tvær vídeóleigur, Nóatún og Krónan í 50 metra radíus frá húsinu mínu. Á ég að trúa því að maður verði að fara á bílnum til læknis og láta kippa úr sér hálskirtlunum?

...
- grettir :: vonandi verður þetta ekki svona endajaxladæmi

Fór á tónleika Dúndurfrétta í gær með Óla og Ingvari. Þar braut ég bjórloforðið mitt sem ég setti um síðustu helgi.

Bjórguðirnir hafa ekki fyrirgefið mér og var ég því með ljómandi hausverk í morgun.

...
- grettir :: farinn í kellingadrykkina

Einn ferðafélaginn var að benda mér á að skv. ferðaplaninu stóð til að koma heim 12. febrúar. Ég gerði náttúrulega þau taktísku mistök að leggja þá bara í'ann þann 12. sem þýðir að ég kem ekkert heim fyrr en 13.

Ég veit nú svosem um margt verra en að hanga einn dag í viðbót í framandi heimsálfu og það á föstudagskveldi. Bara passa að panta ekki flug heim frá London of snemma, það væri nú klassískur grettir. Fínt að vera bara í London á laugardagskveldinu og koma heim á sunnudeginum. Eða bara sleppa því að koma heim. Spáir úber snjókomu þarna um miðjan febrúar.

Eitt sem ég þarf samt að athuga áður en ég legg af stað og það er hvort maður þurfi ekki að fá einhverjar sprautur í rassinn, því síst af öllu vill maður koma með eitthvað bóbó heim.

Ójá, ég þarf líka að fara að drífa mig í að endurnýja vegbréfið. Ég verð nefnilega á faraldsfæti í haust. Frankfurt þann 13. sept. og París þann 18. okt. og vegabréfið er á síðasta söludegi.

...
- grettir :: fær maður ekki rafrænt vegabréf næst?

Hljóp alltof lengi í morgun í of þröngum boxerum og er kominn með þessi fínu nuddsár á vonda staði. Til að toppa þetta langar mig geðveikt í vindil.

Ætli það sé ekki hægt að fara til læknis og láta hann skera úr sér þetta drasl sem heimtar alltaf vindil um leið og maður vaknar. Maður gæti þá kannski látið skera af sér tillann í leiðinni. Hann lætur mann segja ótrúlegustu hluti þegar maður fær sér í glas... eða hætta að fá sér í glas.

...
- grettir :: tough call

Upphitun fyrir menningarnótt var tekin í gær með einu mögnuðu bjórkveldi. Óminnishegrinn var eitthvað á stjái og er kvöldið svona hægt og bítandi að rifjast upp og ekki allt gott.
Til dæmis hef ég ekki hugmynd um afhverju fötin mín eru út um alla íbúð. Ég hef ekki enn fundið nærbussurnar og er mig farið að gruna að ég hafi gleymt að klæðast einum slíkum áður en ég fór út í gær.

Anyways, lítið við því að gera annað en að svala brennivínspúkanum að nýju með því að halda ægigóða grillveislu í kvöld. Þeir sem vita símanúmerið mitt eru að sjálfsögðu velkomnir, stutt í bæinn, menn mæta með sína eigin kind eða kú eða svín eða eggaldin á grillið og þetta verður meirisháttar.

...
- grettir :: drekk til að gleyma

Antisportistinn ég hef algerlega misst af þessum blessuðu Ólympíuleikum. Nú var einhver að anda því út úr sér að strandblak kvenna væri ólympíuíþrótt.

...
- grettir :: whaaaaat

Á forsíðu moggans í dag er snilldar fyrirsögn sem ég veit að Jay Leno vinur minn hefði gaman að:

"Sprengingar valda titringi"

...
- grettir :: nei, nú ertu að grínast?

Þegar ég fór til US fyrr í sumar, þá keypti ég mesta letitæki sem sögur fara af: rafmagnstannþráðagræju.
Kanar eru sumsé svo latir að þeir nenna ekki einu sinni að flossa með handafli. Ég ákvað að slást í þann hóp.

Anywho, tækið virkar eins og heil tannlæknastofa og þegar ég byrjaði daginn á minni árlegu ferð til tannsa, þá tók það hann ekki nema tíu mínútur að komast að því að allt væri í himnalagi.

...
- grettir :: hreinar tennur maður :D

Sérstaklega þegar maður er búinn að koma svona málum í framkvæmd.

Það er enn ekki of seint að slást í Ríó hópinn. "Blankur blankur" er ekki afsökun sem er tekin gild. Maður hefur nægan tíma til að safna að sér fé í ellinni og enginn skyldi gleyma að maður kemst ekki með bréfpeninga til helvítis.

...
- grettir :: þetta verður ferð aldarinnar

Ég ætla að vona að Margmiðlun hætti ekki að vera uppáhaldsfyrirtækið mitt þó Tal hafi keypt þá. Ég er nú í viðskiptum hjá báðum, svo ég ætti að vera í nokkuð góðum málum.

En ég er sumsé með smá sögu. Í síðustu viku fékk ég tilkynningu um böggul og missti að sjálfsögðu þvag af spenningi, enda ekki á hverjum degi sem maður fær böggul í pósti. Þegar ég fór og sótti hann var þetta gjöf frá Margmiðlun, þráðlaus heimilissími í þakkarskyni fyrir að skrá heimasímann hjá þeim!

...
- grettir :: átti nú reyndar einn fyrir, en hvað um það

Ég hef sjaldan eða aldrei vaknað svona úber hress á mánudegi eins og í morgun. Ég deildi þessum hressleika aleinn, því þegar ég mætti í gymmið, þá var enginn á svæðinu.
Og ég er ekki að taka svona til orða, heldur var ég gersamlega aleinn (fyrir utan gaurinn í afgreiðslunni).

Helgin var annars sérdeilis prýðileg og var skundað út á lífið bæði kvöldin langt framundir morgun. Sem skilaði sér í yfirnáttúrlegri þynnku í gær, en henni má nú alltaf redda með einum sveittum Kentucky borgara.
Ég var narraður á Players á föstudaginn þar sem SSSól spilaði fyrir dansi. Þar var nú ekki stoppað lengi skal ég segja ykkur. Jæja, maður varð að prófa.

Já - fór líka í brúðkaup + skírnarveislu á laugardaginn í bongó blíðu. Til lukku Gísli og Guðrún!

...
- grettir :: stefnir í heila vinnuviku :-(

Skipti yfir á Skjá einn áðan og greinilegt er að dómsdagur hefur runnið upp.

Þeir eru byrjaðir að sýna tuðruspark !!

...
- grettir :: mér er ekki skemmt

Í fyrsta lagi átti ég að sjá um morgunmatinn. Ég dreif mig því í bakarí snemma í morgun og keypti nokkur kíló af kökum og kleinuhringjum.

Þegar ég er með morgunmat, þá er ekkert hollt sett á borð.

Í öðru lagi átti ég að mæta á fund gæðastjóra í innri úttekt á verkefni sem ég er búinn að vera að vinna í síðasta eina og hálfa árið. Í því verkefni er ég verkefnisstjóri yfir sjálfum mér og ganga á úr skugga um að ég sé að fylgja vottuðum gæðastöðlum í að reka á eftir... tja... sjálfum mér.

Þessi fundur var blásinn af vegna veðurs, en morgunmaturinn var svo sætur að ég er í sykursjokki.

...
- grettir :: bjór í kvöld

Mörg furðuleg, ósanngjörn, smáborgarleg og lummó lög eru í gildi á Íslandi, en lögin sem banna veitingastöðum að hafa borð úti á gangstétt lengur en til tíu þegar veðrið er eins magnað og það hefur verið þessa viku, eru án efa sigurvegari í vondulagakeppninni.

Kvöldið var sumsé stytt umtalsvert þar sem öllum var hent inn klukkan tíu. Og ég sem var rétt að komast í stuð.

...
- grettir :: brennivínspúkinn verður vakinn annað kvöld

Ég er að spá í að henda Orkuveitunni út og byrja að kynda með olíu eða kolum og leggja þannig mín lóð á gróðurhúsaáhrifavogarskálarnar.
Næsta mál á dagskrá verður að saga hvarfakútinn undan bílnum. Ég nenni ekki í jeppa pakkann, þó það gæti reynst mun áhrifaríkara.

...
- grettir :: sveittur dagur maður

Ég hef komist að því að tölvupóstur bráðnar eða eitthvað ef hitinn kemst yfir 20 gráður. Allavega hefur enginn svarað einu eða neinu í morgun og býst ég því við að fara heim á hádegi, reyna að brenna dálítið myndarlega úti í garði eða hjólandi einhversstaðar.

Skipulagning Río ferðar er langt komin og stefnum við á að kaupa miða í dag eða á morgun. Lagt verður af stað frá Keflavík 27. janúar og komið aftur 12. febrúar.
Þetta verður í fyrsta sinn sem ég fer þá suður fyrir miðbaug og er ekki laust við að ég sé að fá pípandi niðurgang af spenningi.

...
- grettir :: það er enn ekki of seint að slást í hópinn

Bróðir minn númer 3 fékk bílprófið á laugardaginn, tók daginn snemma og lagði af stað norður á land. Bíllinn gafst upp á miðri leið (japanskt drasl) svo ég fór og dró hann í Borgarnes, skutlaði pilti í bæinn og lánaði honum minn bíl.

Í gær fékk svo bróðir númer 2 botnlangakast og var lagður inn í skyndi og skorinn.

Mér er hætt að lítast á blikuna... samkvæmt þessu er ég næstur!

...
- grettir :: orðlaus

Ég gjörsamlega grenjaði úr hlátri þegar ég las þetta.

Ég hef áður minnst á hversu miklir endemis snillingar eru í Blue Man Group og núna er ég að drepast, mig langar svo að sjá showið. Nú er sýningin komin til Evrópu og á Austurströndina, svo maður þarf ekki að ferðast yfir hálfan hnöttinn, alla leið til Las Vegas til að sjá þessa trúða.
Ekki að maður myndi hata það mikið að koma til Vegas.

...
- grettir :: æj, fokk hvað mig langar í heimsreisu

Í ölæði um daginn var ákveðið að skella sér til Ríó á kjötkveðjuhátíð. Mínir menn eru komnir í skipulagsgírinn og stefnir í myndarlegan hóp, eða hóp myndarlegra, sem ætla að skella sér.

Maður getur ímyndað sér að til sé margt leiðinlegra í heimi en að hanga í Ríó, það get ég alveg sagt ykkur. Svo hef ég aldrei komið til Suður-Ameríku.
Með fullri virðingu fyrir 3ja vikna sólarlandaferðum, been there, done that.

...
- grettir :: hver er með?

Maginn er ennþá í uppreisn í dag. Mér varð flökurt þegar ég heyrði af Chilli réttnum í hádeginu. Þá var aðeins eitt til ráða. Rölta út í búð og versla hið ultimate survival kit fyrir mallakútinn sinn. Það samanstóð af:

Tveim bönunum
Tveim maltdósum
Þrem kókómjólk
Tveim skyrdollum
Kippu af LGG+

Ef ég verð ekki orðinn hress á morgun á ég aldrei eftir að drekka aftur...ekki svona mikið að minnsta kosti. Hold on. Endurorðum þetta: aldrei eftir að drekka hvítvín, gin, bjór og captain sama kvöldið.

...
- grettir :: maður á það til að fara yfir strikið í eyjum

Ég veit að ég lét ýmis ljót orð falla um eyjar fyrir tveimur árum, en það var bara af því að ég var í viku að þurrka fötin mín enda rigndi fyrir árið á þeirri einu helgi.

Nú var öldin önnur og vil ég meina að ég hafi átt stóran þátt í því, enda ekki með neitt nema regnföt í töskunni, þegar ég hefði þurft stuttbuxur. Og ég var á hóteli, svo það hefði svo sem mátt rigna eldi og brennisteini mín vegna.
Sérstaklega eftir að við fundum potta- og gufuaðstöðuna í kjallaranum, með setustofu, inniskóm og baðsloppum sem voru svo mjúkir að þó maður hefði dottið ofan í dollu fulla af súkkulaðibúðing, þá hefði manni ekki geta liðið betur.

Aðalgrín helgarinnar var að sjálfsögðu nafnagrínið, en við Óli Fly vorum að djamma með gömlum skólafélaga mínum sem heitir líka því fallega nafni Grettir. Það trúði okkur auðvitað ekki nokkur kjaftur og við svöruðum alltaf báðir þegar Óli var að tala við annan hvorn okkar.

Staðan er sem sagt sú, að þó ég hafi verið með æluna í hálsinum frá því að við komum út á flugvöll og þar til ég lagðist upp í sófa heima og sé ekki búinn að éta ætan bita síðan á sunnudagskvöld vegna þess að maginn er á röngunni, þá var þetta hin mesta gleði og engin spurning að maður mætir að ári.

...
- grettir :: spurning um að reyna við morgunmat