- grettir.net

Í dag reiknar Guðlaugur Þór út hvað það hefur kostað okkur að missa Davíð úr Seðlabankanum.
26. febrúar 2009 hættir Davíð og gengisvísitalan er 190
31. mars 2009 er gengisvísitalan 212

Það að missa Davíð hefur rýrt krónuna um 12% og vill Guðlaugur Þór senda norska verkamannaflokknum reikninginn.

Gott og vel. Fyrst það á að fara að draga menn til ábyrgðar, þá skulum við horfa aðeins tilbaka.

20. október 2005 byrjar Davíð í Seðlabankanum og gengisvísitalan er 101
26. febrúar hættir Davíð og eins og Guðlaugur bendir á er Gengisvísitalan 190 þann dag (fór hæst í 250 á tímabilinu).

Munurinn er 86,7%

Guðlaugur? Á ég að senda reikninginn beint til þín eða upp í Valhöll?

Fyrir nokkrum dögum kom ég að þvottavélinni okkar í einhverju dramakasti, blikkaði villuskilaboðum og pípti vesældarlega.

Ég fletti skilaboðunum upp á netinu og komst að því að villan þýddi að vélin kæmi ekki frá sér vatni og vandamálið væri stíflað sigti, klemmd slanga frá vélinni eða ónýt dæla.
Í leiðbeiningarbæklingnum með vélinni (sem ég fann á bakvið vélina þegar ég leitaði að klemmdu slöngunni) voru nokkuð góðar leiðbeiningar um það hvernig laga ætti dæluna. Reka inn í hana prik og reyna að snúa.

Ég gerði það. Fyrst var hún dáldið stíf, en svo losnaði hún og snérist nokkuð létt.

Vélin rauk í gang og er bara hress. Líklega hefur dælan verið full af handklæða flöffi.

Tveimur dögum síðar fær uppþvottavélin samskonar kast. Blikkar villuskilaboðum og pípir vesældarlega. Við uppflettingu í bæklingnum kemur í ljós að vélin kemur ekki frá sér vatni. Ég reif úr henni sigtið, smúlaði og þreif og vélin er eins og ný.

En þetta fékk mig til að hugsa um það hvort ég ætti ekki að drífa mig til læknis í fyrirbyggjandi skoðun á þvagrás? Svona áður en ég lendi í því að koma ekki frá mér vatni.

Ef öflugasta vopnið í vopnabúri Sjálfstæðismanna er að hræða landann með skattmann, þá er flokkurinn aumari en ég hélt.

Þetta er svona eins og ef hópur fólks héldi geðveikt partý, væri vikið úr húsnæðinu sem hýsti gleðskapinn og myndi svo gagnrýna ræstingafólkið fyrir að nota gula gólfsápu en ekki einhvern veginn öðruvísi við þrifin.

Ég líka!

Leikkonan Reese Witherspoon hefur gefið þá tímamótayfirlýsingu að hún þoli ekki að vaska upp.

Ég fylgdi eiginkonu minni í mæðraskoðun í morgun. Hún var skoðuð hátt og lágt og fékk fulla skoðun.

Ég fékk hins vegar auglýsingablað vegna námskeiðs fyrir verðandi feður, því nýlegar rannsóknir benda til þess að nútíma karlmenn séu farnir að taka virkari þátt í uppeldi barnanna og námskeiðið á að upplýsa karlmenn um það hvað felst í því.

Það þarf enginn að segja mínum börnum þær fréttir, enda hugsum við jafnt um okkar börn.

Í dag er ég búinn að vera giftur í eitt ár. Það er pappírsbrúðkaup.

Ég þarf að koma við í bókabúð á eftir.

Það var "bixí" matur hjá okkur í gær. Margrét að vinna og við nenntum ekki að hafa mikið fyrir matseldinni.

Ég tók út smá lambakjöt sem hafði verið í afgang einhvern tíma um daginn, steikti á pönnu. Fyrir krakkana gerði ég brauð með skinku, osti og ananas í ofni.
Drengurinn minn borðaði brauðið með bestu lyst en heimasætunni þótti lítið til þess koma: Ég vil ekki bananas! Þetta er ógeð! sagði hún með vanþóknunarsvip og át allt lambakjötið frá mér.

Á visir.is er frétt um ferðalag páfa til Angóla. Áður en þið lesið fréttina, rifjið upp hvað ár er núna.

[...]Á laugardaginn hvatti páfinn fólk til þess að lifa í ótta við anda kirkjunnar. Hann bætti við að kaþólska kirkjan ætti að reyna að ná til þeirra sem trúa því á galdra og drauga en mannréttindasamtök hafa haldið því fram að börn í Angóla sé misþyrmt vegna þess að íbúar trúa því að þau séu haldin illum öndum[...]

Gaman!

Ekki ætla ég nú að kvarta yfir því að Lóan sé mætt til landsins en ef ég væri Lóa hefði ég frekar stoppað í Færeyjum.

Ég fór í Húsasmiðjuna um daginn og í stað þess að fá 10% afslátt fékk ég 10% inneign.

Húsasmiðjan ætlar að borga mér 92 krónur næst þegar ég kem og versla.

Ég hlakka til.

Eitthvað finnst sjálfstæðisdindlinum Sigurði Kára og smásálunum á eyjunni ómerkilegt að lækka stýrivexti aðeins um 1%

Eftir samfelldar stýrivaxtahækkanir í mörg ár, þrátt fyrir að verðbólga hafi á tímabili farið upp og niður þá finnst Sigurði og fylgdarsveinum hans 1% lækkun léleg lækkun.

Það er þó lækkun.

Ekki lækkun upp á 3.5% til þess eins að hækka þá aftur um 6% eins og "hans" menn stóðu fyrir, þá er þetta allavega skref í rétta átt - í áttina að núllinu.

Við vorum í sónar í morgun. Nýji bumbubúinn hefur það fínt, er orðinn heilir 5 sentimetrar og spriklar eins og alvöru óþekktarormur.

Margrét er sannfærð um að þetta sé strákur. Ég er ekki eins viss, en við fáum að vita það í maí.

Ef þetta er strákur, þá verður herbergið hálft bleikt og hálft blátt.

Við vorum reyndar að ræða það um daginn að ef okkur vantar eitt herbergi í viðbót, þá fórnum við bara hjónaherberginu og fáum okkur svefnsófa í stofuna.

Ef það ríkir bankaleynd í landinu, hvaða business stunda þá fyrirtæki eins og Lánstraust og CreditInfo?

Er bankaleynd bara fyrir þá sem eiga peninga?

Ætti maður að stofna fyrirtækið DebetInfo?

Get ég flutt íbúðalánið mitt til Cayman eyja eða Tortola?

Í morgun var skutlukeppni í vinnunni. Ég bjó til svona skutlu. Hún er kölluð Besta pappírsskutlan

Ég dundaði mér við það heillengi að moða henni saman, fylgdist vel með Google myndbandinu og fylgdi leiðbeiningum í hvívetna.

Stóra stundin rann upp. Áhorfendur héldu niðri í sér andanum... ég kastaði. Hún sveif. Nokkra metra. Tók svo dífu upp á við og kom til baka þar sem hún lenti 10 sentimetrum fyrir framan marklínuna.

Ég vann ekki.

Ég er nýbyrjaður að hlaupa á víðavangi með fyrrverandi vinnufélögum og stefni á góðan tíma í Reykjavíkurmaraþoninu í sumar.

Ég hljóp 9,1 kílómeter á laugardag í þvílíkt góðu veðri og var eins og Stekkjastaur það sem eftir lifði dags.

Þetta sá ég ekki fyrir mér fyrir nokkrum árum. Þetta er allt hægt að fara á bíl hugsaði ég með mér þegar ég sá hlaupagikki á ferðinni.

Svo kom tímabil þar sem ég öfundaði þá sem drifu sig út að hlaupa og létu almenningsálitið og kuldann ekki á sig fá.

Nú var ekkert annað eftir nema láta slag standa. Það drepur alla úr leiðindum að hlaupa á bretti með Bold and the Beautiful eða eitthvað álíka skemmtilegt í kassanum fyrir framan sig.

Ég skil ekki þessa gjalddaga hjá bönkunum. Nú eru gjalddagar í hverjum mánuði hjá mér og það er ekkert óvænt við þá.

Þeir eru eins og nótt og dagur. Koma og fara nokkuð reglulega.

En það virðist vera þannig í bankageiranum að gjalddagar komi stjórnendur í opna skjöldu. Ha? Borga? Við? Það getur ekki verið..

Og ef ekki er greitt á gjalddaga þá fer bankinn á hausinn. Eins og það sé betra fyrir lánveitandann að fá ekki neitt frekar en að það sé samið um að greiða einhvern hluta núna og rest seinna.

Kannski ættu bankarnir að nýta sér greiðsluþjónustu sem er í boði í.. þið vitið.. bönkunum.

Þegar ég grínaðist hérna um að eitthvað spennandi væri í vændum var ég að grínast.

Þá hef ég líklega samt verið búinn að skjóta í mark án þess að vita það.

Við erum ólétt.

Í september verðum við orðin fimm manna fjölskylda. Það er ekkert smáræði. Við erum búin að máta bílstóla og -púða í bílinn og það sleppur til.

Drengurinn minn varð rosalega fullorðinn við fréttirnar. Hann er búinn að vakna á undan okkur alla vikuna, rista brauð og hjálpa systur sinni í morgunmat.