- grettir.net

Ég og unnusta mín gengum í hjónaband í dag. Við vorum búin að ákveða gifta okkur í sumar og halda veglega veislu og allt þetta týpíska, en ákváðum rétt fyrir páska að fá einfaldlega dómara til verksins.

Við mættum rétt fyrir þrjú í dag, dómari las fyrir okkur þær skyldur sem hjónaband felur í sér og í einni svipan vorum við orðin hjón. Ekki kærustupar. Hjón. Hversu fullorðinslegt er það?

Til stendur svo að bjóða vinum í grillveislu í sumar á pallinum góða. Drekka bjór og borða steik.

Svei mér þá ef ég er ekki aðeins ástfangnari í dag en í gær!

Hræðsluáróður gegn erlendum lánum til almennings kemur eflaust frá þeim fáfróðu skipstjórum er stýra seðlabankanum og þrá ekkert frekar en að allir sitji og standi eins og þeim þóknast.

Mikils misskilnings gætir í fréttum þegar sagt er frá því að höfustóll hafi hækkað svo og svo mikið - fólk verður hrætt og tekur íslenskt verðtryggt lán og tekur á sig gengistap, sem auðveldlega getur gengið tilbaka - öfugt við verðtryggðu ránin.. afsakið .. lánin.

Höfuðstóll erlenda lánsins hefur ekkert hækkað, heldur þvert á móti lækkar hann í hverjum mánuði. Ég skulda færri yen um þessi mánaðarmót en þau síðustu. Höfuðstóllinn er nefnilega í erlendri mynt. Það þýðir ekkert að snúa honum alltaf yfir í krónur og tala um að hann hafi hækkað. Það hefur engin áhrif nema þú ætlir að borga það upp í dag.

Til langs tíma litið er þetta alltaf hagstæðara. Maður er ekkert að tjalda til einnar nætur með því að fjárfesta með erlendu láni í íbúðarhúsnæði. Eftir 25 ár er afborgunin af erlenda láninu orðin hlægilega lítil, en með verðbótum væri íslenska lánið búið að margfaldast og afborganirnar orðnar mörg hundruð þúsund. Launin verða þá væntanlega hærri og lánið væntanlega svipað hlutfall af þeim og í dag, en erlenda lánið verður greitt með dósapeningum.

Hver hlær þá?

Okkur er boðið í fermingu í óbyggðum á fimmtudaginn. Ég nota tækifærið og rúnta nokkrar ferðir í gegnum göng sem ég er búinn að taka þátt í að borga. Á ég að fara rúnt fyrir einhverja fleiri?

Takið eftir því næst þegar bíll kemur á fleygiferð fram úr ykkur - þrátt fyrir að þið séuð á hámarkshraða + skekkkjumörk - hvort þar sé nokkuð á ferðinni Skoda Octavia.
Ég held nefnilega að gömlu Skóda eigendurnir séu almennt ekki farnir að fatta að það þarf ekki lengur að stíga eldsneytisgjöfina niður úr gólfmottunni til að hræið komist upp brekkur eftir að það var sett VW vél í húddið.
Eða þeir eru að fá útrás fyrir margra ára hægagang á Skódunum sem drifu ekki á móti vindi hvað þá meir.

Takið einnig eftir því næst þegar þið eruð með bíl svo nálægt skottlokinu hjá ykkur að þið finnið andremmuna af bílstjóranum - hvort þar sé nokkuð Yaris á ferð. Yaris eigendum er nefnilega mikið í mun að sína að þeir komist jafn hratt og hinir. Þeir sýna það með því að hanga svo nálægt skottlokinu, að ef maður myndi hósta á bremsuna, þá fengi maður Yaris lagaða beyglu á stuðarann.

Ef Yarisarnir reyna svo að komast fram úr, gerist ekki neitt. Þess vegna hanga þeir í kjölsoginu hjá æðri bílategundum og spara þannig nokkra bensínlítra á viku.

Það eru seld trommusett í næsta húsi við vinnuna mína. Viðskiptavinir eru duglegir við að prófa.

Hressandi.

Ég er með tvær fartölvur í vinnunni, eina IBM og eina Dell.
Ég hef aldrei nennt að nota fingrafaraskannann á Dell vélinni, enda um óhemju flóknar uppsetningar að ræða til að fá hann í gang.

IBM vélin var tilbúin til notkunar þegar ég fékk hana og virkar fingrafaraskanninn á henni svona ljómandi vel að ég ákvað að byrja að nota hann á Dell vélinni líka svo ég geti hugsunarlaust loggað mig inn með kaffibolla í annarri og með vísifingur út í loftið á hinni.

Skanninn á Dell vélinni olli mér vonbrigðum. Hann lætur mig ítrekað skanna og neitar að logga mig inn, er lengi að því þegar hann loksins auðkennir mig og þar frameftir götunum.

Í síðustu viku komst ég loks ekki inn, sama hvað ég reyndi alltaf kom "invalid user".

Rusl er þetta hugsaði ég og renndi bendifingrinum á IBM vélina.. Denied. IBM-inn líka í fýlu. Ég prófaði aftur.. og aftur.. þar til ég tók eftir því að ég var með stóra spartl klessu á fingrafarinu.

Tæknin gerir greinilega ekki ráð fyrir því að tölvunarfræðingar séu í húsaviðgerðum utan vinnutíma.

Muna næst þegar gerir asahláku - að leggja bílnum efst á bílastæðinu en ekki neðst.

Nú eða kaupa mér Nokia gúmmístígvél.

Í gær skráði ég drenginn minn í grunnskóla. Ef það verður ekki til þess að ég fullorðnist, þá veit ég ekki hvað ætti svo sem að verða til þess.