- grettir.net

Þeir eru hressir á þinginu, það er ekki hægt að segja annað.

Um leið og Kastljós vekur athygli almennings á því að þingmenn eru ölvaðir í vinnunni kemur fyrirspurn frá Framsóknarflokknum hversu mikið það kosti á ári að framleiða Kastljós.

Ætli flestir yrðu ekki reknir ef þeir mættu ölvaðir til vinnu. En kúltúrinn á þinginu virðist vera sá að þeir eru hafnir yfir almennar reglur samfélagsins. Elítan.

Bankar fara á hausinn og draga fólk og fyrirtæki með sér í fallinu. Skattfé er notað til að reisa bankana við sem eignast þá fyrirtækin og eignir fólksins sem þeir settu á hausinn.

Er ekki eitthvað öfugsnúið í þessu kerfi sem lögfræðingar og pólitíkusar hafa búið til og stjórna?

Ég sé ekki alveg muninn á þessu og að fara til dæmis niður í Kaupþing eða Lýsingu og gefa einum lögmanni þar á kjaftinn.

Eini munurinn er sá að lögfræðingar hafa skilgreint það seinna sem refsivert athæfi. Ofbeldi.

Það er bara tímaspursmál hvenær almenningi brestur þolinmæði. Það verður gaman að sjá lögfræðingana verjast tjöru og fiðri með innheimtuþóknunum og seðilgjöldum.

Hjálmar Gíslason (hjalli.com) lýsir ágætlega þeim sjónhverfingum sem helvítis íhaldið beitir með skattareiknivélinni sem er eins og krabbamein um allt internet þessa dagana.

Henry Þór afhjúpar blekkingarnar á mjög einfaldan hátt.

Síðasta bólan í teikningunni segir allt sem segja þarf.

Ég er alltaf að komast að því betur og betur hvað bílar eru mikið bras.

Nú eru bremsuklossarnir í bílnum búnir að aftan og ég gerði mér ferð í annað bæjarfélag til að kaupa eitt slíkt sett. Ég stillti mér svo upp fyrir framan húsið mitt, tjakkað bílinn upp og byrjaði að rífa dæluna í burtu. Hún er fest með 16mm bolta.

Í ódýra "LuxTools" topplyklasettinu mínu er ekki 16mm lykill. Hvorki toppur né fastur. Reyndar er ekki 11mm heldur - en tveir 10mm hinsvegar.

Ef þetta er Lux útgáfan af Tools, þá veit ég ekki hvernig strípaða útgáfan er.

Ég fékk því mág minn til að skutlast með 16mm lykil á svæðið og kláraði að rífa dæluna undan.

Þá passa ekki klossarnir sem ég hafði nýkeypt. Allt of stuttir og feitir. Líklega fyrir frambremsur. Eða á Skoda. Þegar ég uppgötvaði mistökin var lítið annað að gera en að setja bifreiðina saman með gömlu klossunum og bölva í hljóði.

Ég labba einn hring í kringum bílinn til að ganga úr skugga um að ég sé með öll verkfæri og tek þá eftir því að það sprungið að framan! Helvítis rugl!

Ég er alvarlega að spá í að hætta þessu bílarugli bara og nota leigubíla og reiðhjólið.

Ég var í matarboði hjá vinafólki okkar fyrir nokkru síðan og var að venju spjallað um daginn og veginn.

Umræðan var farin að snúast um bíómyndir, sjónvarpsþætti og fleira í þeim dúr þegar ein í hópnum segir: Við bara farin að fara í rúmið eldsnemma og horfa á klám.

Ég lít svona í kringum mig og finnst skrýtið að engum öðrum en mér hafi fundist neitt athugavert við þessa hreinskilnu yfirlýsingu.

Já, við fengum helling hjá bróður hans [..nafn..] og erum bara húkt!

Vá, hugsa ég. Voða eru allir opnir og hressir í þessu matarboði.

Ég verð að viðurkenna að ég var dáldið spældur þegar ég fattaði að hún var að tala um Klovn

Við byrjuðum að versla við Kjöthöllina í sumar eftir vinnustaðagrill konunnar í vor þar sem boðið var upp á bestu hamborgara sem við höfum smakkað.
Okkar helstu innkaup til að byrja með voru hinir frábæru hamborgarar, en þeir eru í algjörum sérflokki.
Annað en fjöldaframleiddu vatnsborgararnir sem eru seldir í verslunum og má þakka fyrir að detti ekki ofan í grillið þegar þeir skreppa saman. Og kosta ekkert minna.

Brauð í fullri stærð fylgir með.

Í kjötborði Kjöthallarinnar er líka að finna allskyns buff og fleira gott í hversdagsmatinn og á þriðjudögum er tilboð á kjötfarsi. 250 kall kílóið minnir mig. Börnin eru sjúk í það.

Svo er líka hægt að fá steikur. Svona fyrir helgarmatinn.

Einhver illa innrættur einstaklingur opnaði hurð svo hressilega utan í heimilisbifreiðina fyrir utan Smáralindina/Toys 'r Us á mánudaginn að hún fór hálfa leið inn í bretti.

Við hliðina á bílnum var hvítur bíll - hugsanlega Golf, en þó ekki víst - sem var farinn þegar að var komið.

Ef einhver varð vitni að þessu skemmdarverki má hafa samband við okkur í netfangið bmw hjá grettir punktur net.

Vonandi brennur jólasteikin við hjá skemmdarvarginum.

Fyrir nákvæmlega þremur árum gerðist þetta!

Og nú er dóttir mín er orðin 3ja ára. Vinir hennar og ömmur og afar, frændur og frænkur kíktu í kaffi á sunnudag og gáfu henni bleika pakka sem hún kunni svo sannarlega að meta.


Til hamingju með daginn Elísabet Lilja

Í matsal hjá viðskiptavini heyrði ég á tal tveggja um sjómannaafsláttinn:

Það er að kafna úr frekju þetta lið. Veit það ekki að við gætum skipt út öllum áhöfnum fyrir pólverja á innan við viku!

Ég varð eiginlega svo orðlaus yfir þessari heimskulegu skoðun að ég hafði mig ekki út í orðaskipti við manninn. Hugsanlega hefði ég orðið svo reiður að ég hefði séð eftir einhverju sem ég hefði sagt eða gert. Svo ég sleppti því.

En ef þetta er viðhorfið, hvar ætti að stoppa? Ef tölvunarfræðingar eins og ég (og þessi maður) færum fram á kjarabætur, værum við sáttir við að vinnuveitandi segðist geta skipt öllum í deildinni út fyrir Indverja?

Í öll þjónustustörf væri hægt að raða Tailendingum ef afgreiðslufólk ætlaði að fá launahækkun eða aukna desember uppbót og svo mætti lengi telja.

Hluti af launum sjómannsins fer í að kaupa mat, svo ef manninum við borðið í matsalnum líður betur, þá mætti greiða sjómönnum dagpeninga líkt og öðrum sem ferðast vegna vinnu, en dagpeningar eru skattfrjálsir, enda eiga þeir að duga til fæðis og uppihalds á meðan á ferðalaginu stendur.

Það sem fáir vita er að sjómenn greiða einnig olíugjald og leigu á kvótanum.

Hvað borgar þá útgerðamaðurinn? Já, það er von að þið spyrjið. Hann þarf auðvitað að borga flugfargjald út til að selja skúffufyrirtækinu sínu fiskinn á ódýra verðinu svo hann geti stolið gjaldeyrinum framhjá hlut sjómannanna og nú undanfarið - framhjá gjaldeyrishöftum.

Það er nefnilega misskilningur að þjóðin lifi á fiskveiðum.

Útgerðarmenn lifa á þjóðinni. Eins og sníkjudýr.

Í því fjölmiðlarugli sem við búum við í dag er myndaval með fréttum sérlega árangursríkt áróðurstæki. Allir sjá myndir, en ekki nærri allir nenna að lesa í gegnum leiðinlegar fréttir sem fylgja myndunum.

Frétt mbl.is af því hversu miklar áhyggjur blaðamannafélögin á norðurlöndunum hafa af elsta blaði landsins vegna ritstjóraráðningarinnar er samt best.
Að mati þeirra sem fréttatilkynninguna rita er staða Morgunblaðsins, elsta dagblaðsins á Íslandi, sérlega alvarleg. Þar hafi eigendur ráðið Davíð Oddsson, fyrrum forsætisráðherra landsins sem var Seðlabankastjóri þegar efnahagur landsins hrundi, í ritstjórastólinn. Hann sæti nú rannsókn fyrir þátt sinn í íslenska efnahagshruninu.

Með fréttinni fylgir nefnilega mynd af fréttablaðinu. Og 24 stundum, sem er löngu hætt.