- grettir.net

Jólin voru frábær. Þetta voru fyrstu jólin okkar á Háteigsveginum og þau fyrstu að heiman frá foreldrunum.

Við höfðum tvíréttaða jólasteik, því mér og drengnum finnst hamborgararahryggur vera jólakjöt, en Margrét getur ekki borðað svona reykt stöff, svo við höfðum líka kalkúnabringu. Tvö kíló af hamborgarahrygg fyrir mig og einn dreng er passlegt :D
Sú yngsta á heimilinu sýndi þá tillitssemi að sofa á meðan við borðuðum og tókum upp pakka. Eðalbarn.

Eftir að kirkjuklukkurnar hringdu í Háteigskirkju settumst við að snæðingi og ég hef sjaldan eða aldrei bragðað eins góðan mat.

Börnin fengu þvílíkt magn af pökkum sem sá eldri spændi upp eins og enginn væri morgundagurinn. Kvöldið fór svo í að setja saman Legó og bílabraut. Það er gaman að vera fjögurra í dag.

Á jóladag buðum við svo fjölskyldunum okkar í veislu. Ömmurnar komu með bakkelsi, við gerðum muffins og brauðtertu, sköffuðum osta og kakó.

En gleðilega hátíð öllsömul og hafið það sem allra best :-)

Fréttir eru fullar af frásögnum af brjáluðu veðri víðast hvar, flóðum og ég veit ekki hvað.

Hérna á Háteigsveginum er allt í rólegheitum. Ég fór út með ruslið áðan og sá að nágranninn hefur komið fyrir hvítu gervijólatré úr Byko í garðinum. Þar stendur það þráðbeint í logninu hérna í 105.

Þarf að mæta í vinnuna á morgun. Eftir það verð ég eitthvað lítið við fyrr en í febrúar.
Fæðingarorlof rokkar.

Eins og sjá má vandaði ég mig gríðarlega þegar þessi var búin til...

Ég er búinn að vera heima þessa viku, skiptandi um bleyjur og hugsa um nýja erfingjann og konuna.

Við fórum í 5 daga skoðun í gær og fengum skoðun. Allt lítur vel út og stúlkan braggast vel. Það þykir gott að halda fæðingarþyngd í þessari skoðun og skeikaði ekki nema 25 grömmum að það næðist.
Rólegra barni hef ég varla kynnst. Fáir hafa fengið að sjá hana vakandi, enda snýst lífið um að éta, sofa og kúka svona fyrst um sinn.

Stóri bróðir tekur þessu með stakri prýði og er til fyrirmyndar. Enda vel upp alinn drengur :-)

Ég þarf svo að smella inn einni góðri mynd hérna við tækifæri.

Á föstudaginn 8. desember kom dóttir mín í heiminn. Við fórum upp á spítala um fjögurleytið eftir mallandi verki allan daginn og klukkan 18:16 sá ég það fallegasta barn sem ég hef augum litið - alla 47.5 sentimetrana.

Já, hún er ponsulítil. Ekki nema 11 merkur, enda mamman ekki stór og svo var hún á hraðferð.

Við gistum í Hreiðrinu um nóttina og komum heim í gærkvöldi. Hún er svefnpurka eins og ég og svaf frá hálfellefu til sjö í morgun.

Húsið okkar er tilbúið fyrir jólin. Við erum búin að setja upp seríur, jólagardínur, jóladúka, jólastyttur og baka piparkökuhús.

Það er ekki svo einfalt að baka piparkökuhús. Við ætluðum að reyna að festa það saman með bráðnu súkkulaði, en það tekur nokkra daga að harðna.
Þá reyndum við að festa það saman með bráðnum sykri en hann tekur nokkrar millisekúndur að harðna og þá þarf að hafa snör handtök.
Í hamagangnum datt önnur þakplatan í gólfið og hin er einhvern veginn skökk.

Þetta er samt flottasta piparkökuhús í heimi.

Vinnan mín fékk tilboð hjá Hagkaupum og var okkur boðið að koma eftir lokun í síðustu viku að versla í ró og næði með starfsmanna afslætti. Við notuðum tækifærið og kláruðum að versla jólagjafirnar og jólasteikina.

Eina sem vantar núna er jólabarnið, en það hefur ákveðið að láta bíða eftir sér. Ef hún er eitthvað lík pabba sínum þá er hún ekki að stressa sig og tekur sér góðan tíma í þetta.